Kalpasan a nakapagsapata dagiti kabbutos a baro nga opisial ti GUMIL Filipinas, naangay ti umuna a miting iti Mariano Marcos State University-Batac, Abril 25, 1999.

Dagiti adda: Presidente, Jose A. Bragado; Bise Presidente, Ariel S. Agcaoili; Sekretario Heneral, Martin T. Rochina; Tesorera, Eden C. Bulong; Auditor, Col. Lorenzo Ilustre (ret.); PRO, Ma. Rose A. Cabie; Kameng ti Hunta Direktiba: Arthur Urata, Pete Duldulao, Guillermo Concepcion, Oswald Valente, Elizabeth M. Raquel, Onofrecia I. Ibarra, Mindo N. Aquino, ken William V. Alvarado (agtakem para iti umuna a tawen).

Awan: Business Manager, Rey Andres.

Dadduma pay a timmabuno: Pasado Presidente Honor Blanco Cabie, ken GUMIL Chapter Presidents: Jaime M. Agpalo, Jr. (Pangasinan), John B. Buhay (Nueva Vizcaya), Glicerio C. Gallardo (Isabela).

Nangrugi ti miting iti pananglukat ni Presidente Joe Bragado a nangkablaawanna kadagiti amin a nangabak iti eleksion ti GF. Dinamagna no kasano ti pannakaipagna ti seminar, no adda nagkamtudan ti badyet wenno awan. Ken ti naggapuan ti pundo.

Simmungbat ni Bise Presidente Agcaoili (dati a Sekretario Heneral) a nagkunaanna a nangtedda iti proposal iti National Commission for Culture and the Arts (NCCA) a nangkiddawanda iti tulong pinansial nga aggatad iti P200,000.00. Ngem P50,000.00 laeng ti naaprobaran.

Maipanggep iti nasao a gatad, kinuna met ni nailayon a Direktor Ibarra nga awan pay ti eksakto a gatad. Ngem 300 a delegado ti nagibasaranda iti nagasto. Kinunana pay a naaramid ti seminar ket nagtipon a proyekto ti GUMIL Ilocos Norte (GIN) ken GUMIL Filipinas. No kas pagarigan ta adda pagkurangan ti ginastos, pagguduaan nga ibaklay ti GIN ken GF.

Kinuna ti Secretariat nga adda nagrehistro a 139 a delegado a nagbayad iti dagup a P48,650.00. Sa adda kano donasion nga aggatad iti P150.00 wenno iti pakabuklanna, nakaukkonda iti P48,800.00.

Saan a nailawlawag no asino ti nagsingir iti para iti souvenir program ngem ketdi nagtutulaganda nga ania man a maibayad ket maideposito iti savings account to GUMIL Filipinas. Saan met a nalawag no mairaman daytoy kas napastrek para iti nasao a kombension. Nalabit a napagsasaritaan idin daytoy ti napalabas nga administrasion.

Gapu ta awan pay ti umiso a pannakakuenta dagiti napastrek ken nagastos iti kombension, indatag ni Direktor Urata ti mosionna a leppasenda koma pay ti financial statement (FS) report para iti nasao a kombension sa kalpasanna, mapagsasaritaanto daytoy. Naanamongan ti mosion.

Tapno maaddaan ti GIN iti umanay a gundaway a mangileppas iti FS, naikalendario a maangay ti sumaruno a miting dagiti opisial ti GF ken dagiti presidente dagiti chapter ti GF inton Mayo 23, 1999. Mangrugi ti miting iti alas dies iti bigat iti beach resort ni Presidente Bragado iti Tabucolan, Santa, Ilocos Sur.

Dagiti mapagsasaritaan iti naso a miting:

1. Pannakakuenta ti pundo. (Accounting of Revenues and Expenses).

2. Pannakaaramid ti plano para iti gunglo iti umay a dua a tawen.

3. Ken dadduma pay a mabalin a matratar.

Insaganana ni MARTIN T. ROCHINA. Pinatalgedan ni JOSE A. BRAGADO