Dagiti adda: Jose A. Bragado, Aurelio S. Agcaoli, Martin T. Rochina, Col. Lorenzo Ilustre, Ret. (Host), Reynaldo Andres, Arthur P. Urata, Pete B. Duldulao, Dr. Onofrecia I. Ibarra, Oswald A. Valente, William V. Alvarado, Elizabeth M. Raquel, Honor Blanco Cabie, Dean Gregorio T. Amano (Adviser), Ma. Teresa B. Benas (Abra Chapter).

Dagiti awan: Eden C. Bulong, Ma. Rose A. Cabie, Mindo N. Aquino.

1. Narugian ti miting iti alas 11:40 iti bigat a naaramid iti maysa a beach resort iti Sinait iti panangsangaili ni Col. Lorenzo Ilustre, presidente ti GUMIL Ilocos Sur ken auditor ti GF.

2. Rinugian ni Pres. Bragado ti taripnong iti pananglaglagipna iti daydi Apo Severino A. Lazo, dati nga opisial ti GF, kalpasan ti ababa a kararag a naidaton para kenkuana.

3. Napagsasaritaan/nasupusopan ti minutos ti miting a naangay iti Pinili, Ilocos Norte.

4. Kinuna ni Dir. Valente a saan a nairaman nga absent ni Ex-Officio H. Cabie iti miting a naangay iti Pinili, I.N.

5. Maipanggep iti P50,000.00 nga aggapu iti NCCA, kinuna ni VP Agcaoili a naited kano aminen a kasapulan a papeles.

6. Maipanggep ken ni Virgilio Valdez, kinuna ni VP Agcaoili a maaramid koma ti comprehensive report santo pagsasaritaan ti Board no ania ti nasayaat a maaramid. Pinadas met nga intudo ni Dir. Duldulao dagiti ammona a nabayadanen nga ads iti Souvenir Program. Nagtinnag a naaramid ti resolusion, babaen ken ni Dir. Urata, a madawat ken ni V. Valdez ti panangtednan iti amin a nakolektana iti uneg ti dua a lawas. Mairaman pay a maipatulod kenkuana ti nasao a resolusion nga addaan iti return card ket maipan daytoy babaen kada Dir. Duldulao ken Dir. Concepcion. Sinegundaan daytoy da H.B Cabie ken VP Agcaoili. Sangsangkamaysa a naaprobaran daytoy.

7. Nailawlawag met a ti naited a kuara nga aggatad iti P1,800.00 (neto kalpasan ti 10 porsiento a withholding tax) kas honorarium a naited iti tunggal maysa kada VP Agcaoili ken Rey Duque iti panaglektiurda iti napalabas a kombension ti GF, indonarda iti GF. Na-acknowledge met ti US$100.00 a personal a donasion ni Apo Benilda P. Ponce, Monetary Governor ti GUMIL Greece para iti kombension.

8. Dinakamat manen ni Pres. Bragado ti maipanggep iti Death Aid Benefit (DAB). Insingasing met ni VP Agcaoili a mabukel koma ti permanente a komite a mangipagna itoy ta mamati a kasapulan ti nasao a proyekto ti naan-anay a panawen para iti nasayaat a pannakaipagnana. Insingasing met ni Dir. Urata a maadal koma no ania dagiti mabalin a "legal ramification" daytoy, no adda. Kinuna met ni Dir. Ibarra a saan koman a matagamtam dagiti masasao nga "extra legal matters" tangay para met laeng iti organisasion daytoy. Ken awan kano met ti maikaniwas a napaspasamak kadagiti sabalin a nangaramid itoy. Kinuna met ni VP Agcaoili a maited iti Management Board ti pannakaaramid dagiti alagaden daytoy. Kinuna met ni Dir. Urata a dina pay naadal a nasayaat daytoy. Ken saanna a supiaten ti nasao a DAB. Ngem kinunana nga agboluntario laeng a mangaramid iti legal research iti ania man a rumsua a problema gapu itoy.

9. Naaprobaran ti nasao a minutos ti napalabas a miting kalpasanna.

10. Iti pannakaituloy ti miting, inreport ni Pres. Bragado a P1,800.00 ti nagasto iti 300 a kopia ti umuna nga isyu ti BALIKAS, ti baro a pagiwarnak ti GUMIL Filipinas, ken iti ID cards. Innayonna a donasionnan daytoy. Kinuna met ni VP Agcaoili a mai-reflect daytoy a kas donasion ken mairekord a nasayaat. Sinarurongan daytoy ni Apo Cabie.

11. Napagsasaritaan pay ti Seminar-Workshop (SW) a maaramid iti Sto. Nino Seaside Resort. Kinuna ni Pres. Bragado a nangidonar ti GUMIL Greece iti US$400.00 (P16,000.00) a maited nga honorarium dagiti aglektiur. Sag-P2,000.00 kano. Innayon ni Pres. Bragado nga ania man a pagkurangan ti magasto iti workshop, ibaklaynanton.

12. Kinuna met ni Apo Cabie a naiwaragawag kanon ti maipanggep iti SW iti sabsabali a pagiwarnak malaksid iti BANNAWAG.

13. Gapu ta awan ti naawat a bid para iti masungad a GF Conference & Literary Seminar-Workshop, insingasing ni Pres. Bragado a ti GF ti ag-host ket mabalin a maaramid iti Sto. Nino Seaside Resort iti Tabucolan, Santa. IS.

14. Kinuna met ni VP Agcaoili a maaramid koma manen a kas iti napalabas nga awan ti beauty contest.

15. Inmosion ni Adviser G. Amano a ti GF ti ag-host iti "2000 GF Convention." Kinuna met ni VP Agcaoili a maawagan koma ketdi a "Millennium." Sinarurongan met ni Apo Cabie ti mosion ni Adviser Amano.

16. Sangsangkamaysa dagiti immatendar a nangaprobar a maangay ti komperensia iti Tabucolan, Santa, Ilocos Sur inton Abril 28, 29, ken 30, 2000.

17. Kinuna met ni Dir. Urata a no addanto Chapter Muse, ma-recognize-to daytoy. Banag a sinarurongan ni Dir. Valente.

18. Kinuna met ni Pres. Bragado a no addanto man maaramid a Cultural Presentation, mabalin a maaramidto iti Town Plaza. Kada maipabuya, agatiddog laeng iti sangapulo a minuto.

19. Nadakamat ti tema. Ngem napagtutulagan a pumanunot ti amin ket mapagsasaritaanto dayta iti sumaruno a miting.

20. Nadakamat met ni Apo Cabie a naladaw a napakaammuan iti pannakapilina a mangibagi iti Komite iti Literary Arts iti NCCA. Nga awan ti naawatna a pakaammo para iti miting iti Oktubre ken Nobiembre.

21. Naidawat ken ni Apo Cabie a saludsodenna kano no mabalin a mapunduan ti para iti kanen dagiti delegado manipud iti ited ti NCCA. Kadagiti ngamin napalabas, nausar laeng para iti honorarium dagiti lektiur. Naidawat a mangted koma dagiti amin nga aglektiur iti kopia dagiti lektiurda. Nainayon pay nga adda kano pay ited ti NCCA iti GF a P3,000.00.

22. Para iti Bucaneg Awardees, nakiddaw a mangted dagiti Chapter President iti resolusion a manginominar iti kayatda a maikkan iti award.

23. Napagnunumuan a maangay ti umuna a miting iti Tawen 2000 iti maudi a Domingo ti Enero iti Child Jesus College, Bagong Silang, Caloocan City.

24. Kamaudiananna, inmosion ni Apo Cabie ti panagyaman ti GF ken ni Col. Ilustre iti panangsangailina iti 4th Quarterly Meeting ti GF.

25. Naaramid ti pannakaala ti pakalaglagipan a retrato kalpasanna.

Insagana ni MARTIN T. ROCHINA, Sekretario Heneral
Pinatalgedan ni JOSE A. BRAGADO, Presidente.