UMUNA A BILANG OKTUBRE-NOBIEMBRE-DISIEMBRE 1999
 Daytoy ti umuna a bilang ti Balikas, ti opisial a pagiwarnak ti GUMIL Filipinas. Saan ketdi a kabarbaro daytoy a pagiwarnak. Napagungar laeng ta adda idin pagiwarnak ti GF, ti GUMIL Filipinas, nga inan-anusan idi ni Apo Juan S.P. Hidalgo, Jr. a tinartaraken. Nagpaut daydi a pagiwarnak iti uppat a bilang. Kada bilang, addaan iti bukod a grupo dagiti editor. Idi panawen ni Dr. Godofredo S. Reyes kas presidente ti gunglo, adda met nairuar a pagiwarnak ti gunglo, ti GUMIL News, a naibunong kadagiti delegado iti maysa kadagiti tinawen a komperensia ti gunglo iti Suso ni Aran Beach Resort, Sta. Maria, Ilocos Sur. Ni met Apo Jose A. Bragado, bise presidente idi ti gunglo, ti nangiruar itoy a pagiwarnak. Nagpatingga laeng daydi a pagiwarnak iti maymaysa a bilang. Ita, addan ti Balikas. Paset daytoy kadagiti proyekto ni Apo Bragado iti panagtakemna manen a presidente ti gunglo (immuna a nagtakem idi 1989-1991). Idi damo, nabuniagan `toy main-inaw idi a napagungar a pagiwarnak iti Gumildamag. Idi addan iti typesetting, nagbalin a Bucaneg. Pagsayaatanna ta adda pay nalalaing a bumuniag agingga iti napili ti Balikas. Agyamantayo itoy nalaing a bumubuniag, ni Apo Reynaldo A. Duque. Nakurapay pay laeng ti GUMIL Filipinas isu a kapilitan a ti agdama a presidente ti GF ti nangibaklay iti pannakaimaldit daytoy a bilang ti Balikas. Kas kunana, kasapulan unay daytoy tapno adda agserbi a rangtay iti nagbaetan ti liderato ti GF ken dagiti kameng ti gunglo. Wen met ngamin, masapul a maammuan dagiti kameng no ania ti mapaspasamak iti gungloda (ti GF). Ken masapul met a maammuan ti liderato no ania ti mapaspasamak kadagiti kamengna. Malaksid kadagita, adda pay mainayon a pangipablaakan dagiti kameng kadagiti gapuananda. Agpayso, narigat no kasla nabungon iti ulimek ti gunglo. Masapul nga adda met maukap a ngiwat tapno awan ti agpugpugto no ania ti mapaspasamaken iti gunglo ken adda mangibando kadagiti aktibidad ti gunglo. Masapul met nga adda maimaldit a balikas a pangtaliawanto dagiti kameng no ania ti napaspasamak iti gunglo kadagiti naglabas a panawen. Sapay koma ngarud ta mataraken ti Balikas—ket agsasanganto a kasla nagtagisima a kimat. Kas itay kunadan, nangrugi ti amin iti balikas ket sapay koma ta rugi metten daytoy ti ad-adda pay nga ilalangto ti GUMIL Filipinas.
CLES B. RAMBAUD |
 Maangay itoy a Nobiembre 19, 20, ken 21 iti Tabucolan, Santa, Ilocos Sur ti literary seminar-workshop para kadagiti napili a mannurat nga Ilokano iti panagtinnulong ti GUMIL Filipinas ken ti GUMIL Greece. Basaen ti pakabuklan daytoy a damag
Asino ti mangsangaili iti millennium conference? Agawaten ti GUMIL Filipinas iti "bid" manipud kadagiti amin a tsapter probinsial para iti pannakaangay ti komperensia ken literary seminar-workshop ti GF inton kalgaw 2000. Basaen ti pakabuklan daytoy a damag
Addanton tulong kadagiti pumusay a kameng ti GF Mairaman kadagiti posible a maisupusop iti Konstitusion ti GUMIL Filipinas ti pannakairaman a pannakasingir manipud iti asino man nga agkameng iti GF ti kontribusionna para iti asino man a matay a kameng ti gunglo. Basaen ti pakabuklan daytoy a damag
Report ti Sekretario Ammuen ti minutos dagiti napalabas a miting ti GF (umuna a miting idi Abril 25 ken ti quarterly meeting idi Mayo 23). Basaen ti detalye dagiti minutos
Makisalipka met, Kaka! Ammuen dagiti agdama a pasalip iti literatura Iluko. Makisalip itan! Basaen ti detalye daytoy nga artikulo
Iti Bukodko a Panirigan... Mangrugi itoy a bilang ti Balikas, in-inut a maipablaak ti libro nga Iti Bukodmi a Panirigan: Tapno Makasuratka iti Daniw, Sarita, Salaysay ken Nobela da Jose A. Bragado, Dionisio S. Bulong, ken Casimiro Is. De Guzman, a damo a rimmuar idi 1978 ken nairanta para kadagiti agdadamo a mannurat. Basaen ti pakabuklan daytoy nga artikulo
|
AGSURAT E-MAIL 1 E-MAIL 2 DAP-AYAN MAKIDAP-AY [registration required] MAKIDAP-AY [free for all] PAGPIRMAAN AGPIRMAAK NAGPIRMA 
Addan sumag- a naisar-ong iti BALIKAS DADDUMA PAY BURNAY TANGGUYOB
|
