Maangay itoy a Nobiembre 19, 20, ken 21 ti literary seminar-workshop para kadagiti napili a mannurat nga Ilokano iti panagtinnulong ti GUMIL Filipinas ken ti GUMIL Greece.

Maangay ti tallo-nga-aldaw ken dua-a-rabii a panagiinnadal iti Tabucolan, Santa, Ilocos Sur.

Napasingkedan ti pannakangay ti seminar-workshop iti maikatlo a regular a board meeting ti GF idi Agosto 22 iti Pinili Municipal Hall iti panangsangaili da Mayor Samuel S. Pagdilao, Sr. ti Pinili, Ilocos Norte, ken ti kaingungotna, ni Dr. Anunciacion T. Duldulao, prinsipal ti Pinili Institute.

Kinuna ni Jose A. Bragado, presidente ti GF, nga agyaman ti sibubukel a GF iti GUMIL Greece nga idauluan ni acting president Berlito Valdez iti pinansial a tulongda tapno maangay ti literary workshop, umuna iti pakasaritaan ti GF.

Sagdudua a delegado manipud iti tunggal tsapter probinsial ti GF ti manamnama nga umatendar iti nasao a literary workshop a pakaamirisan dagiti sarita ken daniwda.

Kinuna ni Bragado a manamnama a babaen itoy, ad-adda pay a maasa ti pluma dagiti mannurat babaen ti panangtarabay kadakuada dagiti maimbitaran a beterano a mannurat iti Iluko. Mangrugi ti workshop iti malem ti Biernes ket agpatingga daytoy iti malem ti Domingo a pakayawatanto ti certificate of participation kadagiti delegado.

Awan ti bayadan a registration fee dagiti maipatulod a delegado malaksid a libre ti kanen ken pagturoganda.