Mairaman kadagiti posible a maisupusop iti Konstitusion ti GUMIL Filipinas ti pannakairaman a pannakasingir manipud iti asino man nga agkameng iti GF ti kontribusionna para iti asino man a matay a kameng ti gunglo.

"No mabalin, kayatko nga iti kanito a masingir ti membership wenno annual ti maysa a kameng ti GF, mairaman metten a masingir kenkuana ti kontribusionna para iti death-aid benefit," kinuna ni Jose A. Bragado, presidente ti GF.

Kalikaguman ni Bragado a maamendaran ti Konstitusion ti GF iti kabiitan a panawen tapno mayayon met iti panawen `toy pagbatayan-a-paglintegan ti gunglo.

Kiniddawna kadagiti amin a kameng ti GF nga idatagda koma ti amin a singasingda nga enmienda ti Konstitusion ken ni Dean Gregorio T. Amano, chair ti Committee on Constitutional Amendments, itoy nga adres: Open University, MMSU, Batac, Ilocos Norte.

Iti indatag ni Bragado a singasing maipanggep iti death-aid benefit system iti board meeting ti GF idi Agosto 22, mairaman dagitoy kadagiti kangrunaan a paset ti nasao a singasing:

1. Makolekta ti P100 kas death-aid benefit fee manipud iti asino man a kameng ti GUMIL Filipi-nas malaksid iti masingir kenkuana a P100 a membership wenno annual fee. Masapul a masingir ti nasao a death-aid benefit fee iti uneg ti lima a bulan manipud iti regular a petsa (iti Abril) a pannakasingsingir ti membership/annual fee. No saan, saan a mairaman ti kameng kas "paying member" iti death-aid benefit system iti dayta a tawen.

2. Maideposito amin a makolekta para iti death-aid benefit iti banko a designaran dagiti opisialn ken kameng ti hunta direktiba ti GF. Maisupadi daytoy a banko iti banko iti banko ti GUMIL Filipinas.

3. No agsingir iti death-aid benefit dagiti asideg a kakabagian ti pimmusay a kameng ti GF, ipakitada ti orihinal a kopia ti death certificate ken xerox copy daytoy iti Sekretario wenno Tesorero ti GF. Agbati ti xerox copy iti Tesorero para iti rekord.

4. Awan ti mairuar a kuarta manipud iti deposito iti Death-Aid Benefit malaksid iti naituding a gatad a para iti pimmusay a kameng.

5. Masapul a naurnos amin a rekord maipanggep iti Death-Aid Benefit, ken saluadan daytoy ti Tesorero ti gunglo.