Dagiti adda: Pres. Jose A. Bragado, Sec. Gen. Martin T. Rochina, Treas. Eden C. Bulong, Auditor Lorenzo Ilustre, Bus. Mgr. Reynaldo Andres, Dir. Pete Duldulao, Dir. Onofrecia I. Ibarra, Dir. Elizabeth M. Raquel, Dir. Guillermo I. Concepcion, Adviser Dr. Godofredo S. Reyes, Adviser Dr. Visitacion Mamuad, Adviser Editor Dionisio S. Bulong.

Dagiti awan: VP Aurelio S. Agcaoli, Dir. Mindo N. Aquino, Dir. Arthur P. Urata, PRO Ma. Rose Cabie, Dir. William V. Alvarado.

Dagiti nangsangaili: Mayor Samuel S. Pagdilao Sr., Dr.Anunciacion D. Pagdilao, Vice Mayor Cornelio Y. Dacanay, ken dagiti kameng ti Sangguniang Bayan ti Pinili, I.N.

Nagkadua a paset ti naaramid a miting ti GUMIL Filipinas iti Pinili, Ilocos Norte. Ti naangay a programa iti Pinili Municipal Hall ti immuna a paset. Nag-emcee ni Dir. Raquel. Iti programa, kalpasan ti invocation ni Dir. Ibarra, nangted met iti pammasangbay a bitla ni Dir. Duldulao. Kalpasanna, sinaggaysa nga imparang ni Sec. Gen. Rochina dagiti opisial ken mamalbalakad ti GF kada Mayor Pagdilao. Inyam-ammo met ni Bise Mayor Dacanay ni Mayor Pagdilao. Kalpasanna, nangted ni Mayor Pagdilao iti Inspirational Talk. Nagbalin pay nga Honorary Members ti GF da Mayor Pagdilao ken Dr. Anunciacion Pagdilao ket pinagsapata ida ni Dr. Reyes iti panangsaksi da Editor Bulong ken Pres. Bragado. Kalpasanna, nagyaman met ni Presidente Bragado iti nabara unay a panangsangaili da Mayor Pagdilao kadagiti taga-GF.

Kalpasan ti programa, naayawis ti nabaknang a pangaldaw. Ket inimas dagiti nakimiting ti kilawen a kalding ken ti napudot a digo ti pinapaitan. Kasta met nga inimasmi ti pinakbet ken atsara a rabong.

Kalpasan a nakapagpalpakami, naituloyen ti miting.

Kalpasan a linuktan ni Pres. Bragado ti maikatlo a miting ti GUMIL Filipinas Executive Officers, Board of Directors, ken Advisers iti ala 1:50 iti malem, narugianen a napagsasaritaan dagiti naituding nga agenda.

1. Kalpasan dagiti naaramid a panangsupusop/panangatur/panangilawlawag iti naaramid a minutos ti napalabas a miting, inmosion ni Bus. Mgr. Andres ken sinegundaan met ni Dir. Valente ti pannakaaprobar ti nasao a minutos.

2. Indawat ni Dir. Ibarra a mailanad koma amin nga awan labas dagiti mapagpapatangan iti kompleto a detalye dagitoy iti maaramid a minutos ti miting. Ngem kinunami met a narigat ti pannakaaramid dayta, malaksid ngata no mai-tape record daytoy ket daytoy ti agbalin a rekord ti gunglo.

3. Mainaig iti nasao iti ngato, kayat kiniddaw ni Dir. Ibarra ti 50 porsiento a bingay ti GUMIL Ilocos Norte iti naganansia iti napalabas a kombension. Kinuna met ni Treasurer Bulong nga adda pay P50,000.00 nga aggapu koma pay iti NCCA. Ngem amin kano a resibo a mainaig itoy, naiteden kada Ariel Agcaoili/Honor Blanco Cabie.

4. Kinuna met ni Dr. Reyes a dawaten koma ken ni Pasado Presidente Cabie a tumulong a mang-account kadagiti pundo, nga adda koma uppat wenno lima nga opisial a tumulong a mangdalus kadagiti amin nga accountabilities.

5. Kinuna met ni Dir. Ibarra a ti laengen maipapan iti Souvenir Program ti yan ti dadduma a problema. Ket ditoy a naukag manen ti problema ken ni Virgilio Valdez. Napagtutulagan manen a masuratan daytoy iti adresna iti No. 12, San Nicolas, Ilocos Norte.

6. Adda pay mosion da Bus. Mgr. Andres ken Dir. Ibarra a mangideklaran ken ni V. Valdez a saanen a kameng ti GUMIL manipud iti Agosto 22, 1999. Ngem kinuna met laeng ni Bus. Mgr. Valdez a mauray pay ti resulta ti surat manen ni Treas. Bulong ken ni V. Valdez.

7. Nagreport ni Pres. Bragado ket intedna ti listaan dagiti dinutokanna a chairman ken kameng dagiti nadumaduma a komite babaen iti bileg nga inkawes kenkuana ti Constitution & By-Laws ti GF. (Nabunongan dagiti immatendar.)

8. Mainaig iti pannakaamendar ti Konstitusion ken By-Laws ti GF (rimmuar daytoy nga isyu idi maibasa ti nagan dagiti mangbukel iti Committee on Constitutional Amendments), adda dinakamat ni Pres. Bragado a mabalin nga amendaran a paset daytoy ket dagitoy koma ti maited iti komite tapno adalenda. Mainaig pay iti daytoy, kinuna met ni Dr. Reyes a 2/3 vote ti masapul tapno maratipika ti ania man a maamendaran iti nasao a Konstitusion ti gunglo.

9. Adda inaramid ni Pres. Bragado a guidelines para iti GF Death Aid Benefit ket nawarasan man aminen nga adda iti miting iti kopia daytoy. Kayat ni Pres. Bragado a tunggal chapter, no mabalin, aprobarandan daytoy tapno mayimplimentarton iti sumuno a komperensia (masingirton sadiay ti kontribusion para iti dayta a tawen). Mainaig itoy, kinuna ni Dir. Ibarra a nalawag koma ti regulasion maipanggep itoy.

10. Inreport pay ni Pres. Bragado ti proyekto a tallo-nga-aldaw a literary seminar workshop ti GF a maangay iti Sto. Nino Seaside Resort ken pakitinnulongan ti GUMIL Greece. Kinunana a nangikari ti GG iti P15,000.00 para iti daytoy ket isun (ni Pres. Bragado) ti makaammo a mangibaklay iti pagkuranganna. Addan guidelines nga inaramid ni Pres. Bragado. Dua a delegado ti aggapu iti tunggal chapter.

11. Marugian metten ti GUMILDAMAG a pagiwarnak ti GF. Ti presidente pay laeng ti mangigasto iti pannakaimaldit daytoy. Ti publication committee ti mangiggem itoy.

12. Kinuna met ni Dr. Reyes nga awan pay laeng ti pasalip iti avant-garde poetry iti daytoy a tawen ta mausar ti pundo a pangilibro kadagiti nangabaken iti daytoy.

13. Kinuna met ni Editor Bulong a ma-institutionalize koma dagiti awards nga ipapaay ti GF. Maymaysa laeng koma daytoy nga award a saan ket a tunggal presidente, mangbuangay iti kabukbukodanna.

14. Naikeddeng a ti sumaruno a miting ti GF, esponsoran ni Col. Ilustre ken ti GUMIL Ilocos Sur nga idauluanna. Maangay daytoy iti Nobiembre 14, 1999 iti Teppeng Cove, Pug-os, Sinait, I.S.

15. Idi malpas ti miting (saanen a nakapagpasiar ti grupo kadagiti historikal a lugar iti Pinili), naaramid ti pakalaglagipan a piktorial a kadua ti grupo da Mayor Pagdilao ken ti kaingungotna.

Insagana ni MARTIN T. ROCHINA, Sekretario Heneral
Pinatalgedan ni JOSE A. BRAGADO, Presidente.