Salip iti Sarita 2000-2001
Don Vicente Pacioles Award
for Iluko Literature
Dagiti Pagannurotan:
- Naluktanen ti salip ket agpatingga daytoy iti Enero 31, 2001.
- Maluktan ti salip kadagiti amin a mannurat iti Iluko iti Filipinas ken iti ballasiw-taaw.
- Makapakatawa a sarita (humorous story) ti pagsasalipan, 10-15 a panid, maimakinilia wenno computer-typed iti doble espasio iti 8-1/2” X 11” a bond paper. Madiskalipika ti pakisalip a mamagbalin iti pisikal a depekto ti maysa a tao a kas pagkakatawaan.
- Maysa laeng a sarita ti mabalin nga isalip ti kada mannurat. Ipatulod ti sarita iti uppat a kopia. Parbo a nagan ti usaren ti autor. Pakuyogan ti pakisalip iti narikpan a sobre a naglaon iti paulo ti sarita, pudno ken parbo a nagan ti autor, kompleto nga adres iti pagtaengan wenno iti pagtrabahuan, maysa a nalawag a ladawan, ken ababa a pakasaritaan iti biag.
- Nasken nga orihinal, di naipatarus manipud iti ania man a lengguahe, ket di pay nangabak iti ania man a pasalip, ti isalip a sarita.
- Adda karbengan dagiti esponsor ti pasalip a mangilibro kadagiti mangabak a sarita ken mangpaiblaak kadagitoy iti pilina a magasin.
- Dagiti premio: Umuna a Gunggona: P7,500; Maika-2: P5,000; Maika-3, P4,000; Umuna a Pammadayaw a Gunggona: P2,000; ken Maika-2 a Pammadayaw a Gunggona: P1,500. Maipaayanto pay iti plake ti pammadayaw dagiti mangabak.
- Mapakaammuanto dagiti mangabak no pakaangayan ti seremonia ti pammadayaw.
- Ipatulod ti pakisalip iti di naladladaw ngem Enero 31, 2001 itoy nga adres: Salip iti Sarita 2000-2001, Don Vicente Pacioles Award for Iluko Literature, c/o Cles B. Rambaud, Liwayway Publishing, Inc., 2249 Chino Roces Ave., 1231 Makati City.
|
