MAIKA-2 A BILANG ENERO-PEBRERO-MARSO 2000
 ITI KALKALPASNA a Baro a Tawen dagiti Intsik (Pebrero 4), naawiskami (Cles B. Rambaud, Daniel L. Nisperos, ken Juan S.P. Hidalgo Jr) a dimmaw-as iti U.P. Creative Writing Center iti Diliman, Quezon City. Ni Dr. Ariel S. Agcaoili ti Departamento ti Arts and Sciences ti Unibersidad ti Pilipinas ti nangawis kadakami para iti kunana a "Kuwentuhan" kas paset ti panangrambak ti unibersidad iti arte ken kultura itoy a Pebrero. Kayatdakami kano a makapatpatang (kasta ti panagawatmi) iti unibersidad maipanggep iti panagsursuratmi iti Iluko. Impagarupmi no ti kunana a "Kuwentuhan" ket tungtongan laeng ti sumagmamano nga estudiante kas iti tungtongan iti sirsirok ti akasia. Saan met gayam. Ta naklaatkami idi iserrekdakami iti de alpombra a conference room nga addaan pay kadagiti kasla uong a managadu a mikropono ket kunam la no addakami iti General Assembly ti United Nations. No ti rantami ket mapan laeng koma gumatang iti sangaprasko a suka, saan metten, kaka, ta agbalinkami met gayamen a guest of honor and speaker--nangruna ket adda pay gayam ni Dr. Cristina Pantoja-Hidalgo a pangulo ti U.P. Creative Writing Center. Kaskam la naaw-awanan a nagpuesto iti medio paliad a tugaw. No mabalin la koma, alun-onennakami pay laeng ti nalukneng a tugaw wenno ti alpombra wenno mariingkami itoy batibat a dimi ammo no ania ti sumaruno a mapasamak. Napia ken ni Manong Johnny ta nadlawmi nga umisem-isem laeng a kasla magangganasan a mangbuybuya iti nakaad-adu nga estudiante nga agkakalasbang (a natakuatanmi kalpasan ti "Kuwentuhan" nga estudiante gayam da Dr. Agcaoili ken Prop.Noemi Ulep-Rosal) ken dagiti doktor ken agdokdoktorado pay laeng. Ala, dimin ibagbaga kadakayo no ania ti nakarkarawami nga insawsawang (ken no ania ti imbinglay ni Manong Johnny). Ti laeng maibagami, isu ti nakitami a kinaarisgar dagiti immatendar a dimngeg kadakami nupay awan sa pay lima a nangitayag kadagiti imada idi saludsoden ni Manong Johnny no asino ti Ilokano kadakuada. Ala, wen, mabalin a napilitanda laeng nga immay dimngeg ta absentda no kua iti klase da Dr. Agcaoili ken Propesora Rosal, ngem saanen a dayta ti nasken. Ti nasken, immayda ket naammuanda a sibibiag ti Literatura Iluko, umang-anges, ken kumugkugtar. Ket no adda uray maysa wenno dua laeng kadakuada nga agtuloy a mangadal no ania nga agpayso nga ayup daytoy Literatura Iluko, di kad' nasayaat unay. Napintas unay daytoy iganggannuat ni Dr. Agcaoili, ken uray pay ni Propesora Rosal, a naammuanmi a mangisursuro iti lengguahe nga Iluko kadagiti saan nga Ilokano. Napintas, kunami, ta iti bukod a wagas dagitoy dua a maipagpannakkel a mangisursuro itoy mapagraraeman nga unibersidad, tumultulongda iti pannakayam-ammo ti Literatura Iluko kadagiti saan nga Ilokano ken uray payen kadagiti Ilokano iti ikub ken ruar ti unibersidad. Ipakpakitada ti kinabaknang ti literaturatayo, a saan a maudi daytoy kadagiti dadduma a literatura. Ket ar-aramidenda met daytoy babaen ti naan-anay a suporta ti unibersidad. Apay ngata, kunkunami, nga idinto a dagiti mararaem a propesor a kas kada Dr. Agcaoili ken Propesora Rosal a mangisursuro iti pagtamtamdan nga unibersidad iti Filipinas, saanda nga ibain ti kina-Ilokanoda, saanda nga ibain ti panagsaoda iti nakayanakanda a lengguage, saanda nga ibain ti agsurat iti dayta a lengguahe, ken ibumbunannagda pay ketdi ti kinapintas ti lengguahe nga Iluko, adda met dagiti mangisursuro nga Ilokano nga arigna pawilanda pay dagiti ubbingda wenno estudianteda nga agsursuro nga agsurat iti Iluko, a kasla ketdin maibaba ti kinataoda no agsuratda iti Iluko, a kasla ketdin awan mamaay ti pagiwarnak ti pagadalanda no adda bennegna iti Iluko. Ala, naimbag la ketdin ta adda dagiti kas kada Dr. Agcaoili ken Propesora Rosal nga iti laksid ti kinangaton ti adal a naagpangda, pulos a dida nalipatan, pulos a dida ibain ti kultura ti puli a naggapuanda. * * * SALUDUANMI ti agdama nga administrasion ti GUMIL Filipinas iti babaen ni Presidente Jose A. Bragado iti panangpandayda iti Death Aid Benefit. Babaen itoy, masaranay ti pamilia ti pumusay a kameng ti GUMIL Filipinas. Nupay bassit laeng ti mailatang a tulong, ti nasken adda. Ken kangrunaanna, maipakita pay ti panagtitinnulong dagiti kameng kadagiti pakarigatan a pasamak a kas itoy.Iti agdama, nakaladladingit a panunoten ngem iti laksid ti kunatayo a kinasingedtayo iti tunggal maysa a kameng ti GUMIL, no tiempo a sumina ti maysa kadatayo, awan payen panawentayo a mangsarungkar wenno mangtan-aw iti bangkay dayta a kadua ken mangipeksa iti pannakipagladingittayo iti inulilana. Ngem babaen ti Death Aid Benefit, uray kaskasano, addan wagas a pangipeksatayo iti pannakipagriknatayo iti pamilia ti kaduatayo a mannurat nga umun-una ngem datayo a mapan sumaklang iti Katan-okanen a Mannurat. Mainaig itoy, saluduanmi met ni Apo Fernando B. Sanchez ti San Nicolas, Pangasinan a makuna nga immuna a nanginaw itoy a tignay. Idi Bise Presidente pay laeng ni Apo Sanchez iti GF (1995-1997) iti babaen ti administrasion ni Prop. Honor Blanco Cabie, insingasingnan, ken naaprobaran, ti Mutual Aid System, a pakasaranayan ti pamilia ti pumusay a kameng ti GF. Ngem saan laeng a nayimplimentar daytoy a kas iti inar-arapaapna gapu iti mabilbilang laeng iti ramay a nagkameng. Nupay kasta, babaen ti panangikalikagum ti administrasion ni Apo Bragado, napagungar ti Mutual Aid System, napasayaat ket napatibker babaen ti Death Aid Benefit, nangruna ket manamnama nga agbalinton a paset ti Constitution and By-Laws ti GF.
CLES B. RAMBAUD |
 Maangay ti komperensia nasional ken literary seminar-workshop ti GUMIL Filipinas itoy nga Abril 28-30, 2000 iti Sto. Niņo Seaside, Tabucolan, Santa, Ilocos Sur. Basaen ti pakabuklan daytoy a damag
Death Aid Benefit, inaprobaran ti Board Nagkaykaysa dagiti opisial ken kameng ti hunta direktiba ti GUMIL Filipinas a nangaprobar iti pannakapaadda ti tulong a kuarta para iti pamilia ti asino man a pumusay a kameng ti GUMIL Filipinas. Basaen ti pakabuklan daytoy a damag
Dr. Reyes, nayakkub iti Yloco Journal Rimmuaren iti imprenta ti umuna a bilang ti Yloco Journal, baro a pagbasaan iti tallo a lengguahe: Iluko, Filipino, ken Ingles. Basaen ti pakabuklan daytoy a damag
Saludes, manamnama a dumar-ay iti GF Conference Manamnama a dumar-ay ni Mrs. Pacita C. Saludes, presidente ti GUMIL Hawaii, agraman sumagmamano a kakaduana, iti komperensia ti GF itoy nga Abril. Basaen ti pakabuklan daytoy a damag
Report ti Sekretario Ammuen ti minutos dagiti napalabas a miting ti GF (3rd Quarterly Meeting idi Agosto 22, 1999 ken ti 4th Quarterly Meeting idi Nobiembre 14, 1999). Basaen ti detalye dagiti minutos
Literary Seminar-Workshop ti GUMIL Filipinas ken GUMIL Greece Ania met ti makuna dagiti delegado a dimmar-ay iti Literary Seminar-Workshop ti GUMIL Filipinas ken GUMIL Greece iti Sto. Niņo Seaside Resort, Tabucolan, Santa, Ilocos Sur idi Nobiembre 19-21, 1999? Basaenyo ti imparangkap a padas ti dua kadagiti delegado--maysa a tsika, ken maysa a barako: Sapay koma ta awisendatayto manen! ni Cecilia Peta-Kuan Basaen daytoy a salaysay Saluduanmi ti GUMIL Greece! ni Delfin P. Dumayas Basaen daytoy a salaysay
Iti Bukodko a Panirigan... Maika-2 a serye iti in-inut a pannakaipablaak ti libro nga Iti Bukodmi a Panirigan: Tapno Makasuratka iti Daniw, Sarita, Salaysay ken Nobela da Jose A. Bragado, Dionisio S. Bulong, ken Casimiro Is. De Guzman, a damo a rimmuar idi 1978 ken nairanta para kadagiti agdadamo a mannurat. Basaen ti pakabuklan daytoy nga artikulo
|
NAPALABAS NGA ISYU BILANG 1 AGSURAT E-MAIL 1 E-MAIL 2 DAP-AYAN MAKIDAP-AY [registration required] MAKIDAP-AY [free for all] PAGPIRMAAN AGPIRMAAK NAGPIRMA 
Addan sumag- a naisar-ong iti BALIKAS DADDUMA PAY BURNAY TANGGUYOB
|
