Komperensia
ti GUMIL Filipinas,
maangay iti Abril 28-30
Maangay ti komperensia nasional ken literary seminar-workshop ti GUMIL Filipinas, ti gunglo dagiti mannurat nga Ilokano iti Filipinas ken ballasiw-taaw itoy nga Abril 28-30, 2000 iti Sto. Niño Seaside, Tabucolan, Santa, Ilocos Sur.
Ti GUMIL Filipinas a mismo ti mangsangaili itoy a komperensia, iti panangidaulo ti presidente ti gunglo, ni Jose A. Bragado.
Manamnama a nasurok a 200 a mannurat ti umatendar itoy tallo nga aldaw ken dua a rabii a taripnong. Aggapuda kadagiti aktibo a chapter ti GF: ti GUMIL Ilocos Norte nga idauluan ni Pete Duldulao, GUMIL Ilocos Sur nga idauluan ni Col. Lorenzo Ilustre (Ret.), GUMIL Abra nga idauluan ni Marites Beñas, GUMIL Pangasinan nga idauluan ni Jimmy Agpalo, Jr., GUMIL Metro Manila nga idauluan ni Martin T. Rochina, GUMIL Cagayan nga idauluan ni Antonio P.N. Urata, GUMIL Isabela nga idauluan ni Glicerio Gallardo, GUMIL Nueva Vizcaya nga idauluan ni John Buhay, GUMIL Hawaii nga idauluan ni Pacita C. Saludes, GUMIL California nga idauluan ni Rodrigo Dacanay, ken GUMIL Greece nga idauluan ni Berlito Valdez.
Itoy a tawen, maipamaysa dagiti teknik iti panagsurat iti piksion kas mapagiinnadalan. Mairaman kadagiti naawis nga aglektiur da Juan S.P. Hidalgo Jr., Dionisio S. Bulong, Reynaldo A. Duque, ken Dr. Aurelio S. Agcaoili.
Registration fee: P350.00. Mausar daytoy para iti kanen, pagturogan, ken sertipiko ti umatendar.
|