Rimmuaren iti imprenta ti umuna a bilang ti Yloco Journal, baro a pagbasaan iti tallo a lengguahe: Iluko, Filipino, ken Ingles.

Rummuar mamimpat iti makatawen ipablaak ti Gemstone Publication & Services Corp. (GPSC) daytoy ken iti panangedit da Herminio S. Beltran, Jr., hepe ti Center for Literature ti Cultural Center of the Philippines; Martin T. Rochina, presidente ti GPSC; ken Herman G. Tabin ti Asian Development Bank.

Nairaman iti umuna nga isyu ti paset ti interbiu ti Yloco Journal ken ni Dr. Godofredo S. Reyes, Poet Laureate ti Ilokandia, a nagpaay nga akkub ti umuna a bilang ti journal.

Kadagiti interasado a maaddaan iti kopia, agsurat itoy nga adres: Gemstone Publication & Services Corp., Greenwoods Executive Village, Lot 1, Blk. 14, Phase II, corner Cottonwood/Redbud Sts., Pasig City, Philippines. Bayad ti maysa a kopia agraman pannakaibusonna: P98.00; makatawen (4 isyu), P325.00; iti ganggannaet, makatawen (4 nga isyu): US$35.00.

Iti sabali a bangir, naammuan nga inibbatanen da Salvador A. Espejo, Jaime M. Agpalo, Jr., Ben de Peralta, ken dadduma pay a kakaduada ti Sirmata, ti binulan a magasin a pagpapaayan ni Arsenio B. Cortez Sr. kas publisher, tapno ipamaysadan ti Saringit Magazine. Gapu itoy, simmublat kas baro a set of editors ti Sirmata da Cris Ilustre, Prescilano N. Bermudez, ken Solomon V. Benitez.

Agtultuloy latta met ti pannakaipabpablaak ti Saluyot, ti opisial a pagiwarnak ti GUMIL Metro Manila, ti Pangasaan ti GUMIL Isabela, ken Tangguyob ti GUMIL Oahu. Para iti kopiayo, agsurat kadagiti presidente dagiti naagapad a gunglo.