Saludes, manamnama a dumar-ay iti GF Conference
Manamnama a dumar-ay ni Mrs. Pacita C. Saludes, presidente ti GUMIL Hawaii, agraman sumagmamano a kakaduana, iti komperensia ti GF itoy nga Abril, kas impakaammo ni Jose A. Bragado, presidente ti GF.
"Uray kasano ti rigat, dukot, no la ketdi nasalun-at datao, ikarkarigatantayo ti dumar-ay iti komperensia ti GUMIL Filipinas." Daytoy ti kinuna ni Mrs. Saludes, kas indanon ni Apo Bragado iti BALIKAS.
Malagip a ni Mrs. Saludes ti maysa kadagiti nakipagtagtagibi iti GUMIL Filipinas. Kadagidi umuna a tawen a maang-angay ti GF conference iti Suso ni Aran Beach Resort iti Sta. Maria, Ilocos Sur, saan a nangliwliwat ni Mrs. Saludes a nangan-andingay kada agkaingungot a Dr.Godofredo S. Reyes ken Dr. Dedicacion Agatep-Reyes.
Iti sabali a bangir, indanon met ni Orlando D. Pagdilao, Head Founder ti GUMIL Greece, a nalabit awan ti makadar-ay kadakuada iti komperensia. Kinuna met ni Arsenio B. Cortez Sr. ti GUMIL California a bareng makawayanto ti presidente ti gungloda, ni Rodrigo Dacanay.
"Makaammokayo koman a mangpaspasensia kadakami!" kinuna met ni Amado I. Yoro, presidente ti GUMIL Oahu iti pannakiuman ti BALIKAS kenkuana iti telepono. Saan kano met a makadar-ay iti komperensia.
Nupay kasta, idanon ni Apo Yoro ti kablaawna kadagiti amin a dumar-ay iti komperensia.
|