PASADO alas onse iti bigat iti dayta a Biernes, Nobiembre 19, idi dumtengkami iti Sto. Nino Seaside, Tabucolan, Santa, Ilocos Sur a pakaangayan ti tallo nga aldaw nga espesial a literary seminar-workshop a pagbinnuligan nga isayangkat ti GUMIL Filipinas ken GUMIL Greece. Kaduak da Marites Bagaoisan ken Veronica Salvador, agpada nga estudiante iti MMSU-CE, a delegado ti GUMIL Ilocos Norte.

Nadatnganmi ni Apo Juan S.P. Hidalgo Jr. (adviser ti GUMIL Filipinas ken dati a Managing Editor ti BANNAWAG, a kain-innuman ni Arlon Serdenia (reporter iti DZVV Bombo Radio-Vigan). Karaman dagiti sinaludsodna maipanggep iti pornograpia ken di pannakaikankano dagiti mannurat iti Iluko. Naibaga ni Apo Hidalgo a basol daytoy dagiti nagannak ken dagiti mannursuro.

Namrayak ti nakipatpatang kada Manong Martin T. Rochina (sekretario heneral ti GUMIL Filipinas ken presidente ti GUMIL Metro Manila), Daniel L. Nisperos (delegado ti GUMIL Metro Manila), ken Johmar R. Alvarez (delegado ti GUMIL Cagayan).
 
Madamdama pay, dimteng ni Apo Jose A. Bragado (presidente ti GUMIL Filipinas). Nadakamatna ti ipupusay ni Apo Pelagio A. Alcantara (dati a presidente ti GUMIL Filipinas). Naipalagip la ket ngarud a bayat ti board meeting ti GUMIL Filipinas iti napalabas a lawas, nagiinnangawan dagiti immatendar ti pannakabangon ti GUMIL Langit--ti laeng dakesna kano no patulodandaka iti imbitasion.

Nakaawid metten da Apo Salvador A. Espejo ken Roy Trinidad a nasapsapa gayam a dimteng ngem dakami.

Madaman a nannanamenmi ti grasia ti nabaknang a pangaldaw idi dumteng ni Cecilia Peta-Kuan ti Baguio City.

Alas dos iti malem idi pormal a naluktan ti programa. Inyam-ammo dagiti naitallaong ti bagbagida. Nakiddaw pay kadagiti delegado ti namnamaenda a mapasamak iti daytoy a workshop. Sinungbatan met dayta dagiti agpaay a panelist.

Kalpasan dayta, naglektiur ni Apo Hidalgo maipanggep iti panagsurat iti sarita. Agingga a dimteng ni Ferdinand R. Batalla manipud iti Pangasinan. Rumabiin idi maburak ti ummong. Agpalpalpakami metten iti dumteng ti bunggoy ti GUMIL Abra nga indauluan ni Marites Beņas a presidenteda. Kaduada da Apo Vic Agaloos ken Apo Fernando Pias. Simmaruno met a dimteng ni Apo William V. Alvarado.

Kabigatanna, sakbay a narugian ti workshop, kiniddaw ni Apo Hidalgo itoy numo nga ilawlawagko no ania ti maar-aramid iti workshop iti UP Creative Writing Center. Kas maysa kadagiti fellow, imbagak a pagdidinniskutiran dagiti fellow ken panelist dagiti manuskrito. Maawagan ti autor kalpasanna.

Madaman ti workshop idi sumangpet da Romeo Bantolino ken Charlie Pinto. Nasapsapa ketdi a dimteng ni Onofre Collado manipud iti Banayoyo, Ilocos Sur.

Immuna a nakritikar ti sarita ni Cecilia Peta-Kuan. Natratar dagiti pagkapsutan ti sinuratna ken naisingasing no kasano a mapapintas. Naisublat ti saritami. Nagduduma dagiti reaksion. Insingasing ketdi ni Apo Rochina a kasapulan ti panagsukisok sakbay a suraten ti maysa a tema.

Iti malem, gapu ta maymaysa ti kopia ti sarita ni Ferdinand Batalla, natudingankami a mangibasa itoy. Napaut ti pannakaparparti daytoy ta nakapsut ngamin ti pannakabalabalana. Naiballaballaet ti panaglektiur da Apo Hidalgo ken Apo Bragado no kasano ti agputar iti sarita.

Sakbay a nangrabiikami, naamiris ti daniw ni Marites Bagaoisan. Naisurat ti daniwna iti pisara. Gapu ta "mamagbaga" ti daniw, nadakamat ni Apo Hidalgo ti pakasaritaan dagiti nagduduma a kita ti daniw agraman ti forte dagiti mannaniw iti napalabas agingga iti agdama. Insingasingna iti tumantanor a mannaniw ti panagbasana kadagiti libro ken magasin a nakaipablaakan dagiti daniw iti Iluko.

Kabigatanna, Nobiembre 21 (Domingo), maudi nga aldaw ti workshop, kas ninamnama, dimteng ni Dr. Onofrecia I. Ibarra. Imburayna met dagiti padasna iti panagsurat. Madamdama pay, nagsubli ni Apo Salvador Espejo. Kaduana da Robert Alicias ken Jaime C. Raras.

Natratar ti daniw ni Apo William V. Alvarado. Gapu iti nagduduma a kapanunotan, nasaludsod la ket ngarud ni Apo Alicias no adda nagduduma a kaipapanan ti maysa a daniw. Naapresiar ketdi daytoy a daniw idi maibugasan a nasayaat daytoy. Naikkan met ti mannaniw iti gundaway a nangilawlawag iti pagtaktakderanna.

Naudi a nakritikar ti daniw ni Fernando Poas. Pasaray mabinggasan iti angaw dagiti kritisismo ket agkakatawakami no kua nangruna kadagiti maisingit a singasing.

Gapu ta nalabesen a pangaldaw, dinagdagnakami ni Dr. Crispina B. Bragado, directress ti Child Jesus College iti Caloocan City ken kaingungot ni Apo Jose A. Bragado, a padayawanmin ti nakadaya a maudi a grasia. Kalpasanna, picture taking.

Naisapa a naileppas ti taripnong tapno maikkan iti gundaway ti bunggoy da Apo Bragado a mapan mangkita iti bangkay ni Apo Pel Alcantara iti pagtaenganda idiay Namnama Village, Parian, San Fernando City (La Union). Kinapudnona, nasapsapa pay a nagpakada ni Daniel Nisperos tapno mapan kano umiliw idiay San Nicolas, Ilocos Norte nga ilimi.

Naragsak ken nabunga daytoy a panagiinnadal. Saluduanmi ti GUMIL Greece iti dakkel a naitulongna iti panagballigi ti taripnong. Sapay koma ta maulitto manen!