Para kadagiti mannurat kadagiti upland municipalities ti Ilocos Sur daytoy a pasalip iti sarita.

Kakuykuyog ti panagdur-as ti in-inut a pannakaipaigid, no di man pannakaiwaksi ti kultura, iti panangarakup iti panagbalbaliw. Pudno daytoy uray pay kadagiti naseksek a lugar. Ket ti kakas-angan nga ibunga ti panangsagrap kadagiti bunga ti panagbalbaliw ti panagbiag isu ti panagbalin dagiti sumarsaruno a kaputotan a ganggannaet iti bukodda a lugar ken puli aglalo no nagdappat dagiti appoda iti sabali a disso.

Gapu itoy, inkeddeng ni Rodrigo M. Dacanay a mangiwayat iti salip iti panagsurat iti sarita iti Iluko tapno makatulong a mangtaginayon iti kultura dagiti Upland Municipalities iti Ilocos Sur. Maysa a mannurat ken nabayagen nga agnaed ni Dacanay iti California. Ngem iti baet ti panagsagsagrapnan iti bunga ti moderno a panagbiag, saanna pay laeng a nalipatan ti nariinganna a kultura ti kaputotanna—ta tubo met iti nasao a deppaar.

"Kalpasan ti nabayag a tiempo a panagag-agawak, napanunotko a panawenen tapno ipatungpalko ti maysa kadagiti dardarepdepko—ti itutulongko a mangpreserba iti nakayanakak a kultura," kinuna ni Dacanay. Ket ti panagsurat iti ababa a sarita ti pangrugianna a mangipatungpal iti daytoy.

Dagiti annuroten:

1. Silulukat daytoy a salip iti panagsurat iti sarita iti amin a tubo dagiti Upland Municipalities iti Ilocos Sur a kas iti Galimuyod, Salcedo, Quirino, Alilem, Suyo, Gregorio del Pilar, Cervantes, Lidlidda, Burgos, Banayoyo, San Emilio, Nagbukel, Sugpon, ken Sigay. Iti kaso dagiti annak nga agnaeden iti sabali a lugar wenno pagilian, nasken a pakuyoganda ti pakisalipda iti pammaneknek a nagtaudda wenno dagiti dadakkelda iti maysa kadagiti ili nga adda iti ragup dagiti Upland Municipalities.

2. Nawaya tti mannurat a mangpili iti topikona, ngem nasken nga orihinal ti sarita, ken adda pannakainaigna wenno ipakitana ti wagas ti panagbiag ken kultura ti tinubuanna a lugar wenno puli.

3. Uppat a kopia ti sarita ti ipatulod, agraman ti orihinal, naimakinilia wenno babaen ti computer, iti doble espasio iti 8-1/2" X 11" a bondpaper, nadalus ken nalawag a mabasa ken agatiddog iti 10 agingga iti 16 a panid.

4. Agbalin a kukua ti esponsor dagiti entries. Mainaig iti daytoy, karbengan ti esponsor a paipablaak iti magasin wenno periodikal a pilina dagiti mangabak nga entries, ken mangilibronto inton maurnong ti umdas a materiales.

5. Ti laeng parbo a nagan ti isurat iti manuskrito; ikabil ti pudno a nagan ken ababa a pakasaritaan ti biag a napakuyogan iti 2" X 2" a retrato iti narikpan a sobre.

6. Nangrugi ti salip idi Oktubre 1, 1999 ket aggibus iti Pebrero 29, 2000. Saan a mairaman iti salip ti manuskrito a maawat iti naladladaw ngem ti maudi nga aldaw a naituding a panaggibus ti salip isu a maidagadag ti masapa a pannakaipatulod ti pakisalip. Mayawatto dagiti gunggona dagiti mangabak iti kombension ti GUMIL Filipinas inton Abril 2000.

7. Saan a mabaliwan ti desision dagiti hurado ngem karbenganda nga ibabawi ti premio no maduktalan a tinulad wenno impatarus ti autor ti pinakisalipna iti Iluko manioud iti Ingles ken dadduma pay a pagsasao a gapuanan ti sabali a mannurat.

8. Dagiti gunggona: First Prize, $300 ken plake; Second Prize, $250 ken plake; Third Prize, $200 ken plake; ken tallo a Consolation Prizes a sag-$50 ken plake.

9. Maiturong dagiti pakisalip iti: Board of Judges, Rodrigo M. Dacanay Literary Awards, c/o D.S. Bulong, Bannawag, Liwayway Publishing, Inc., 2249 Chino Roces Ave., 1231 Makati City.