Para kadagiti estudiante iti haiskul daytoy a pasalip iti daniw.

Dagiti Pagannurotan:

1. Silulukat ti salip kadagiti amin nga agad-adal iti haiskul iti sibubukel a pagilian iti School Year 1999-2000. Mangrugi ti salip iti Hunio 28, 1999 ket agpatingga iti Enero 31, 2000.

2. Maysa laeng a set wenno koleksion dagiti daniw a naisurat iti Iluko ti maipalubos nga isalip ti asino man nga estudiante. Lima a daniw ti mangbukel iti maysa a set. Siwawayawaya ti estudiante a mangpili iti tema ken kaatiddog dagiti daniwna. Saan nga ilanad ti estudiante ti pudno a naganna iti pakisalipna no di ket agusar iti parbo a nagan (pseudonym).

3. Ipatulod ti pakisalip itoy nga adres iti di naladladaw ngem Enero 31, 2000:

   Salip iti Daniw iti Iluko
   Sulquiano Awards
   c/o GUMIL Filipinas
   Bannawag, Liwayway Publishing, Inc.
   2249 Chino Roces Ave.
   1231 Makati City.

4. Uppat a kopia dagiti daniw ti ipatulod. Pakuyogan ti pakisalip iti narikpan a sobre a naglaon iti pudno ken parbo a nagan ti autor, nagan ken adres ti pagadalanna, adres ti pagtaenganna, maysa a nalawag a ladawan, ababa a pakasaritaan iti biag, ken sertipikasion ti prinsipal wenno head teacher a mangipaneknek a bukod a putar ti estudiante ti pakisalipna.

5. Dagiti gunggona: Umuna, P5,000.00 ken Plake ti Pammadayaw; Maika-2, P4,000.00 ken plake; Maika-3, P3,000.00 ken plake; ken 3 a Naisangsangayan a Pammadayaw a sag-P1,000 ken plake. Maipaayanto met iti Plake ti Pammadayaw ti pagadalan a paggapuan ti mangabak nga estudiante.

6. Adda karbengan ti esponsor ti pasalip a mangedit ken mangipablaak wenno mangpaipablaak kadagiti mangabak a daniw iti libro wenno pilina a magasin. Agtalinaed ketdi ti copyright iti autor.

7. Ti GUMIL Filipinas, ti gunglo dagiti mannurat nga Ilokano iti pagilian ken iti ballasiw-taaw, ti mangimaton iti pasalip. Mapadayawanto dagiti mangabak iti maysa a pasken nga angayen ti GUMIL Filipinas. Mapakaammuanto dagiti mangabak no kaano a maangay ti seremonia ti pammadayaw ken no pakaangayan daytoy.

8. Tallo ti agpaayto a kameng ti hurado a pakairamanan ti chairman. Dinto mabalusingsing ti pangngeddengda malaksid no matakuatan a saan a bukod a putar ti estudiante ti uray maysa laeng kadagiti daniw a pinangabakna. No kastoy ti mapasamak, maibabawi ti gunggona ti nangabak nga estudiante ket saanto metten a mapalubosan pay a makisalip iti ania man a pasalip ti Sulquiano Awards ken iti amin a pasalip iti panagsuratan nga imatonan ti GUMIL Filipinas.