Para kadagiti amin mannurat daytoy a pasalip iti ababa a sarita, sarita para ubbing, ken daniw.

Dagiti pagannurotan:

1. Tallo ti kategoria ti salip: a) Ababa a Sarita; b) Ababa a Sarita a Para Ubbing; ken c) Daniw.

2. Silulukat ti salip kadagiti amin nga Ilokano.

3. Maysa laeng nga entry ti isalip ti kada autor iti tunggal kategoria.

4. Parbo a nagan tu autor ti agparang iti manuskritona. Pakuyogan ti pakisalip iti narikpan a sobre a naglaon iti pudno ken parbo a nagan ti autor, paulo ti/dagiti pakisalip, ababa a pakasaritaan iti biag, 2" X 2" a ladawan, ken adres.

5. Nasken nga orihinal ti isalip; di pay naipablaak ken di pay nangabak iti ania man a pasalip.

6. Maimakinilia wenno computer-typed iti doble espasio iti regular size (8-1/2" X 11") a bond paper ti isalip. Uppat a nadalus a kopia ti maipatulod (mairaman ditoyen ti orihinal). Agbalin a kukua ti Tawid ti Ilokos Foundation dagiti amin a mangabak nga entry ken adda karbengan ti Tawid a mangipablaak wenno mangilibro kadagitoy ngem ketdi agtalinaed ti copyright iti autor.

7. Iti biang ti ababa a sarita, 8-15 a panid ti kada entry; iti daniw, di ab-ababa ngem 16 a linia; iti ababa a sarita a para ubbing, di nasursurok ngem 10 a panid.

8. Siwawayawaya ti mannurat nga agpili iti tema a suratenna malaksid kadagiti libelous ken seditious. Iti biang ti ababa a sarita a para ubbing, masapul nga agpaay daytoy para kaagiti agad-adal iti elementaria ken maibugas iti sarita ti pannakaapresiar ti kultura/literatura Iluko.

9. Mangrugi ti salip iti Oktubre 1999 ket aggibus iti Enero 31, 2000. Masa-pul a maawat dagiti entry sakbay wenno iti kaaldawan ti nasao a petsa.

10. Dagiti gunggona: a) Cash ken plake para iti umuna a tallo a puesto iti tunggal kategoria; b) Sertipiko ti pammadayaw para kadagiti maika-4 agingga iti maika-6 a puesto; ken c) Maipablaak dagiti mangabak nga entry iti Samtoy.

11. Iturong dagiti entry iti: Board of Judges, Tawid Salip iti Sarita ken Daniw, Tawid ti Ilocos Foundation, Inc., 3 Bonifacio St., Vigan, 2700 Ilocos Sur.