Para kadagiti agdadamo a mannurat daytoy a pasalip iti sarita.

Dagiti Pagannurotan:

1. Silulukaten ti salip. Aggibus daytoy iti Enero 31, 2000.

2. Agpaay ti salip kadagiti amin nga agdadamo a mannurat iti Iluko. Iti biang daytoy a salip, maibilang nga agdadamo ti mannurat no di pay nakaipablaak ti sarita iti Bannawag, wenno no nakaipablaak man, di nasursurok ngem tallo ti naipablaakna agingga iti Agosto 31, 1999 a bilang ti Bannawag.

3. Siwawayawaya ti mannurat a mangpili iti tema ti pakisalipna. Maysa laeng a sarita ti mabalin nga isalip ti autor. Agatiddog ti sarita iti di nakurkurang ngem 10 panid ngem di nasursurok ngem 15 panid, makiniliado wenno computer-typed iti doble espasio iti regular size a bond paper (8-1/2" X 11"). Masapul a nadalus ken nalawag a mabasa dagiti kopia. Umanay a pakadiskalipikaan ti entry ti kinarugitna.

4. Masapul nga orihinal, di naadaw iti ania man a sinurat, di nangabak iti ania man a pasalip iti panagsurat, ken di pay naipablaak iti ania man a publikasion, ti isalip a sarita.

5. Di usaren ti autor ti pudno a naganna iti entryna; pumili daytoy iti kayatna a parbo a nagan (pseudonym).

6. Ipatulod ti pakisalip iti uppat a kopia (mairaman ditoyen ti orihinal). Pakuyogan ti entry iti maysa a narikpan a sobre a naglaon kadagitoy sumaganad: ti pudno ken parbo a nagan ti autor, ti kompleto a mailing address (iti pagtaengan ken iti trabaho, no adda), ababa a pakasaritaan ti biag, ken maysa a nalawag a 2" X 2" a ladawan. Iti rabaw ti sobre, isurat ti paulo ti pakisalip ken ti parbo a nagan ti autor.

7. Dagiti premio: Umuna a Gunggona, P4000 ken plake; Maika-2, P3000 ken plake; Maika-3, P2000 ken plake; ken 2 a Consolation Prizes a sag-P1000 ken plake. Mapakaammuanto dagiti mangabak ken no pangawatanda iti premioda. Aggapu dagiti premio a kuarta iti Patrons for Iluko Literature Association of California, U.S.A. Idonar met ti GUMIL California, U.S.A, iti babaen ni president-elect Rodrigo M. Dacanay, dagiti plake.

8. Di mabalusingsing ti pangngeddeng dagiti hurado. Ngem no matakuatan a sinalungasing ti autor ti Pagannurotan Blng. 4, maibabawi ti gunggonana ken dinton mapalubosan pay a makisalip iti ania man a pasalip ti Patrons for Iluko Literature Association of California, U.S.A.

9. Ipatulod ti pakisalip babaen ti koreo (wenno personal nga idatag) iti di naladladaw ngem Enero 31, 2000 itoy nga adres: Salip iti Sarita, Patrons for Iluko Literature Association, c/o Cles B. Rambaud, Liwayway Publishing, Inc., 2249 Chino Roces Ave., 1231 Makati City.