Tapno maikkan iti naan-anay a panawen dagiti agdadamo a mannurat a mangisagana iti pakisalipda iti Salip iti Sarita iti Millennium ti AMMA Foundation Literary Awards, inkeddeng ti Secretariat ti AMMAFLA a maisanud ti deadline ti pasalip manipud iti Hulio 31, 2000 iti Disiembre 31, 2000. Mapadayawanto met dagiti mangabak bayat ti maika-33 a Kombension Nasional ti GUMIL Filipinas a maangay iti Sto. Niño Seaside, Tabucolan, Santa, Ilocos Sur inton Abril 20-22, 2000.

Ti kompleto a pagannurotan ti salip:

1. Daytoy ti maikatlo a panagpasalip ti AMMAFLA para kadagiti agdadamo a mannurat tapno “ad-adda pay a marubroban ti essem dagitoy a mangpatadem iti plumada.” Naluktan daytoy a salip iti panagsurat iti sarita iti Iluko idi Nobiembre 1, 1999 ket agpatingga daytoy iti Disiembre 31, 2000. Iti biang daytoy a pasalip, maibilang nga agdadamo ti mannurat no di pay nakaipablaak iti nasursurok ngem dua a sarita iti Bannawag agingga iti maudi a bilang daytoy iti Oktubre 1999. Silulukat met ti salip kadagiti amin nga agdadamo a mannurat iti Filipinas ken iti ballasiw-taaw.
2. Nasken nga orihinal ti pakisalip, di pay naipablaak, ken masapul a bukod a putar ti autor.
3. Nasken a nalawag ken nalaka a mabasa ti pannakaimakinilia wenno pannakai-computer-typed daytoy (Times Roman Medium-12 font) iti doble espasio iti regular size a bond paper (8-1/2” x 11"). Agatiddog ti sarita iti 10-16 a panid.
4. Nawaya ti mannurat nga agpili iti tema ti suratenna ngem nasaysayaat no adda pakainaiganna iti pamilia ken iti akem ti ama kas adigi ti pamilia.
5. Maysa laeng a sarita ti maipalubos nga isalip ti kada mannurat. Ti parbo a nagan daytoy ti usarenna iti manuskrito. Uppat a kopia ti ipatulod.
6. Pakuyogan ti pakisalip iti narikpan a sobre a naglaon iti nalawag a retrato ti autor, pudno ken parbo a naganna, paulo ti pakisalipna, ken ababa a pakasaritaan ti biagna.
7. Ipatulod ti pakisalip itoy nga adres: AMMA Foundation Literary Awards, c/o Cles B. Rambaud, Bannawag, Liwayway Publishing, Inc., 2249 Chino Roces Avenue, 1231 Makati City iti di naladladaw ngem Disiembre 31, 2000.
8. Adda karbengan ti AMMAFLA a mangilibro wenno mangpaipablaak kadagiti innem a mangabak a sarita ken kadagiti dadduma pay a mapilina a sarita manipud kadagiti naisalip. Nupay kasta, agtalinaed ti copyright ken panagtagikua ti autor iti saritana.
9. Dagiti gunggona: Umuna, P6,000; Maika-2, P4,500; Maika-3, P3,500; Maika-4, P2,500; Maika-5, P2,000; ken Maika-6, P1,500. Maikkan pay dagiti mangabak iti sertipiko ti pammadayaw.
10. Mapadayawanto dagiti mangabak bayat ti Maika-33 a Kombension Nasional ti GUMIL Filipinas iti Sto. Nino Seaside, Tabucolan, Santa, Ilocos Sur inton Abril 20-22, 2000.
11. Pinal ti pangngeddeng dagiti hurado. Nupay kasta, maibabawi ti gunggona ti mangabak no linabsingna ti Pagannurotan Bilang 2. Saanto metten a mapalubosan pay ti mannurat a makisalip iti ania man a pasalip ti AMMAFLA.