Daytoy ti impakaammo ni Arsenio B. Cortez Sr., publisher ti SIRMATA
Magasin iti pannakaamendar ti pagannurotan ti salip a nairusat itay Hunio 1, 2000. Maisanud met ti deadline inton Enero 31, 2001 imbes nga Oktubre 2000 tapno maaddaan dagiti makisalip iti ad-adu a gundaway a manglinay kadagiti obra-maestrada a mailaban iti SMSIAAS.

Ipakaammo met ni Apo Cortez dagiti kakaduana iti California a coordinators ti nasao a pasalip, da Apo Demy Pacleb, Apo Ismael Olaires ken Apo Manny Quitevis.

Dagiti gunggona: Umuna a Premio - $400; Maikadua - $350; Maikatlo -$300; Maikapat - dua a sag-$200; ken Maikalima - tallo a sag-$100. Umawat met iti plake dagiti umuna a tallo ken sertipiko dagiti maikapat ken maikalima a gunggona. Maited dagiti premio ken mapadayawan dagiti mangabak iti pannakaangay ti nailian a kombension ti GUMIL Filipinas inton Abril 2001.

Silulukat ti salip kadagiti amin a mannurat iti Filipinas man wenno iti ganggannaet. Awan ti maikeddeng a tema ti sarita ngem maipangruna koma dagiti tagipatgen a galad ni Filipino ken saan a maikontra kadagiti agdama a paglintegan iti pagilian. Uray mano ti isalip ti maysa a mannurat ngem maysa laeng ti mabalian a maikkan iti premio a kuarta. Kas pammigbig, maikkan iti plake ti pammadayaw ti/dagiti dadduma a sarita ti mannurat a mangabak.

Agatiddog ti pakisalip iti 10 agingga iti 30 a panid, makiniliado/maikompiuter (12 font Times New Roman) iti doble espasio, iti ababa a coupon bond. Maidatag iti uppat a nadalus a kopia. Parbo a nagan ti mailanad iti manuskrito. Maikabil iti sobre seliado ti pudno a nagan, ababa a pakasaritaan ti biag ken dua a 2" x 2" a ladawan ti autor.

Kangrunaanna, nasken nga orihinal ti/dagiti maisalip a sarita ken nasken a maawat ti Secretariat, SIRMATA Salip iti Ababa a Sarita, 2F Ramirez Bldg., Jose Singson St., Vigan 2700 Ilocos Sur, Philippines sakbay wenno inton Enero 31, 2001. Kukua ti SIRMATA Magasin dagiti mangabak a sarita ngem agtalinaed a nakanagan dagitoy iti autor. (PNBermudez)