Siempre, mairaman ditoyen ni Jimmy M. Agpalo, Grand Prize Winner iti Short Story Division, Iluko Category. Pinangabakna ti "Tupa: Ladawan ni Pangalatok Idi Daan a Milenio."

Ngem di nakadar-ay ni Jimmy gapu iti “problema iti salun-at.” Imbagian ngarud ni kailianna iti Narvacan, Ilocos Sur Eliseo B. Contillo, News Editor ti BANNAWAG. Nag-barong pay ni Rudy a napan iti entablado a nangawat iti nakakahon a balitok a medalia ni Jimmy, ken ti tsekena. Nairut ti panangdakdakulap ni Sen. Blas Ople, naisangayan a sangaili iti dayta a rabii, ken ni Rudy (birngas ni Apo Eliseo).

Naglayus ti makan ken amin a kita ti mainum a produkto wenno ilaklako ti La Tondeña. Ngem “iced tea” laeng ti sinimsimsiman ni mannaniw Daniel L. Nisperos (i-San Nicolas, I.N.). Ni fictionist Johnny Al. Asuncion (i-Sarrat, I.N.), staffmember ti BANNAWAG, ti agkaraayab iti waiter. Wiski ti inug-ugmokan ni Johnny. Red wine ken ni Rudy.

Dagus a nalasin ni Rudy ni Maria “Dada” L.M. Fres-Felix (i-Laoag City) uray idi sangsangpet pay laeng ni Dada. Kas kapintas kano iti piktiurna nga impatulodna iti BANNAWAG. Kadua ni Dada ti pang-Miss Universe a balasangna.

Ni Dada ti nangyalat iti Maika-2 a Gunggona iti Iluko Short Story Category babaen ti saritana nga "Ay-ayam ti Gubat."

Kasla diputado met ni Reynaldo A. Duque iti nangisit nga amerikanana. Isu ti nagbalin a potograpomi iti dayta a rabii. Ni Apo Rey ti nangyalat iti Maika-3 a Gunggona babaen ti saritana nga "Apo Lakay." Thank you, Apo Lakay!

Saan laeng a dayta. Second Prize Winner pay ni Apo Lakay Rey iti One-Act-Play iti Filipino Division, babaen ti dramana a "Kabsat."

Congrats!

Kablaawanmi met ni Daniel (L. Nisperos) iti panangyalatna iti Maika-3 a Gunggona iti Gawad Surian sa Tula ti Komisyon sa Wikang Filipino. Pinangabakna ti daniwna a "Banyagang Bahaghari." Naangay ti awarding ceremony idi Agosto 31, 2000 iti Plaza Dilao, Paco, Manila. Pinagsaruno ni Daniel ti nangabak iti salip iti daniw iti Filipino itoy met laeng a tawen. Maikadua a Gunggona iti immuna a salip.

Kasta, a, barok! (Hm, kasla makitkitak ti nasam-it nga isem ni I.Q. gapu iti kinasiglatmo!)

Itoy nga isyu, madlawyo la ketdi iti Editorial Box a tallon dagiti mangas-asikaso iti BALIKAS. Nainayon ditoy ni Palanca Awardee Roy V. Aragon.

Kinapudnona, manipud pay iti immuna nga isyu ti BALIKAS, tumultulongen kadatayo ni Roy. Isu ti online editor ti BALIKAS manipud pay iti immuna nga isyu ‘toy pagiwarnaktayo. Sarungkaranyo man ketdi iti Internet ti BALIKAS iti sitiona idiay http://www.balikas.com.