Iti sao ken aramid, di agmawmaw ti saranay da agkaingungot a Dr. Godofredo S. Reyes ken Dr. Dedicacion Agatep-Reyes iti GUMIL Filipinas, ti gunglo dagiti mannurat nga Ilokano iti Filipinas ken iti ganggannaet, kas ipaneknek ti sabali manen a panangipakitada iti ayatda iti gunglo babaen ti panangidonarda iti lote a pakaipataderan ti opisial a balay ti GUMIL Filipinas.

Aglawa ti lote iti 200 metro kuadrado, paset daytoy ti nalatak ken aglawa iti 2-ektaria a Suso ni Aran Beach Resort iti Brgy. Suso, Sta. Maria, Ilocos Sur a kukua ken imatonan dagiti agkaingungot nga edukador ken doktor iti medisina. Inyawatda ti Deed of Donation ti lote iti GUMIL Filipinas bayat ti maika-32 a komperensia nasional ti gunglo a maangay iti Santa, Ilocos Sur idi Abril 28-30.

Napatalgedan ti panangidonar dagiti agkaingungot a Reyes iti lote iti naangay a board meeting ti GUMIL Filipinas iti pagtaengan da Dr. Onofrecia I. Ibarra iti Paoay, Ilocos Norte idi Marso 12, 1999 nga inatendaran met dagiti agkaingungot a Reyes.

Sakbayna, naammuan a pudno nga adda idonar dagiti agkaingungot a Reyes iti pannakiuman ti YLOCO JOURNAL ken ni Dr. Reyes para iti umuna a bilang ti nasao a journal. Iti pananginterbiu kenkuana ti YLOCO JOURNAL idi umuna a lawas ti Setiembre itay napan a tawen, kinuna ni Dr. Reyes nga adda 150 agingga iti 200 metro kuadrado nga inlasinna para iti GUMIL Filipinas a mabalin a pangipatakderan ti GF iti opisinana.

Malagip nga iti nasao a beach resort ti masansan a pakaang-angayan ti kombension, komperensia ken literary seminar-workshop ti GUMIL Filipinas kadagiti napalpalabas a tawen. Kinapudnona, nagbalin pay ketdin nga agsingin a balikas ti Suso Beach ken GUMIL Filipinas.

Kinuna ni Dr. Reyes a ti laeng kidkiddawenna, mapatakderan a dagus ti lote iti pasdek ti GUMIL Filipinas.

Iti met biang ti GUMIL Filipinas, impanamnama ni Jose A. Bragado, presidente, nga aramidenna ti amin a kabaelanna, babaen iti tulong dagiti dadduma pay nga opisial ti gunglo, ken dagiti amin a sanga ti GUMIL, iti man Filipinas ken iti gangganaet, tapno mapatakder ti pasdek.

“Mangnamnamaak iti tulong dagiti kaGUMILan tangay para met laeng kadatayo amin daytoy a proyekto,” kinuna ni Apo Bragado, a nagpapaay a bise presidente ti GUMIL Filipinas idi ni Dr. Reyes ti presidente.