Bayat met ti kaadda ni Dr. Agca idiay Hawaii, adda met iti Filipinas ni Engr. Fred Quibol ditoy Filipinas. Tubo ti Caoayan, I.S. ni Manong Fred, kameng ti GUMIL Oahu ken isu pay ti Editor-in-Chief ti TANGGUYOB, magasin ti GO. Kadua ni Manong Fred a nangpasiar kadagiti na-pateg iti biagna nga agnaed iti Caoayan, Ilocos Sur ken Caoayan, Isabela ni Princess a balasitangna. Iti ipapasiarna iti opisina ti BANNAWAG idi Abril 7, napaneknekan dagiti kameng ti BANNAWAG agraman da Arnold Pascual Jose ken Daniel Nisperos a naragsak a tao ni Manong Fred. Dimi la ammo no pudno ti sayangguseng nga idi agangay, Uncle ti pangaw-awagen da Arnold ken Juan (Asuncion) ken ni Manong Fred.

Iti sabali a bangir, dua a mannurat iti Iluko ti nakipartisipar iti kallabes a UP Creative Writing Center Workshop 2000 a naangay iti Baguio City: da Majelyn Monces (napusaksak a balasang a tubo ti Casilagan Norte, Banayoyo, Ilocos Sur) ken Julio V. Belmes (nataraki nga arkitekto ken kangrunaanna, awan pay kapunganna). Para iti sumaruno a Writing Workshop a maangay inton kalgaw 2001, makiuman laeng ken ni Dr. Ariel S. Agcaoili wenno ken ni Daniel Nisperos, Co-Editor ti BALIKAS. Makatulongda kadakayo tapno maikkankayo met iti gundaway a makipartisipar iti workshop dagiti amin a workshop. Libre la ngarud aminen agraman pleteyo nga agpa-Baguio, addanto pay alawansyo. Ngem no maalayon ti alawansyo, dikay agliblibas nga agawid, a? Leppasenyo ti workshop.

Iti pay sabali a bangir, inyalat ni Daniel L. Nisperos ti Maika-2 a Gunggona iti Talaang Ginto: Gawad Surian sa Tula-Gantimpalang Collantes 2000 (Poetry Writing Contest in Filipino) nga inwayat ti Komisyon sa Wikang Filipino itoy a tawen. Naangay ti pammadayaw a seremonia idi Abril 4 iti Ceremonial Hall ti Malakanyang. Saan a ni Presidente Estrada ti naawis a guest of honor and speaker; ni Dip. Ralph Recto ti Batangas. Ngem di nagparang ni Apo Recto, kas kuna ni Apo Daniel.

No malagipyo, inyalat met ni Jimmy M. Agpalo ti Narvacan, I.S., Pangasinan, ken Baguio City, ti Umuna a Gunggona iti Poetry Writing Contest in Filipino ti Homelife Magazine itay napan a tawen. Itoy a mapaspasamak, pudno a maal-alarman dagiti mannaniw iti Tagalog. No naalarmada idi simrek ni Apo Reynaldo A. Duque iti tay-ak ti panagsurat iti Filipino, ad-adda man itan ta adda da Apo Nisperos ken Apo Agpalo. Agbiagkayo! Ay, Mabuhay kayo gayam!

Ania ngata no adda makisalip a Tagalog writer iti salip iti panagsurat iti daniw iti Iluko ket maabak dagiti mannurat iti Iluko? Nalawa ken nauneg ti baybay ti Tabucolan a paglemmesantayo. Tumpawtayonto iti igid ti baybay iti Suso.

Nayalnag idi Abril 9 ti SAGUDAY: ANTOLOHIA DAGITI SARITA ITI ILUKO a libro ti GUMIL Metro Manila iti pagtaengan da Manong Johnny ken Manang Jimena Alegre iti Fourth Estate, Parañaque, Metro Manila. Nagpaay a ninong/ninang iti pannakayalnag ti libro da Mr. Juan Dayang, publisher ti Philippine Graphic ken presidente ti Publishers Association of the Philippines (PAPI), Dr. Godofredo S. Reyes, Poet Laureate ti Ilokandia; Dr. Jimena Alegre ti Division of City Schools, Manila (nagretiron); ken Judge Venn Baclig ti maysa a sanga ti RTC iti Quezon City.

Nakakuarta ti GUMIL Metro Manila ta gimmatang a dagus dagiti ninong/ninang iti libro (P200 ti maysa a kopia) kalpasan a sinagutan ti GMM ida iti saggagaysada a libro. Gimmatang ni Dr. Reyes iti lima; ni Dr. Alegre iti lima; ni Judge Baclig iti sangapulo. Di met nagpaudi ni retirado a police general John Castro nga immatendar met iti pasken, gimmatang met iti lima a kopia.

Thank you, appo a ninong ken ninang, ken general!

Sabali pay a thank you kada Manong Johnny ken Manang Jimena iti naimas a lunch iti launching!

Dati, mai-launch kunatayo no adda yalnagtayo a libro. Ta ditay idi masarakan ti terminona iti Iluko ti launch. No dikam mariro, ni Madam Elizabeth Madarang-Raquel ti Ilocos Norte ti immuna a nangidatag iti news item iti Benneg ti Damdamag ti BANNAWAG a nakaaramatan ti balikas a “yalnag” wenno “mayalnag.” Manipud idi, us-usarenen ti BANNAWAG dayta a balikas ken dagiti appo a mannurat iti Iluko. No nagrirokami iti daytoy a kinunami, maammuanmi koma babaen ti panangiturongyo iti suratyo iti Gumilsurat a benneg ti BALIKAS.

Adda manen napasangpet ti BALIKAS a nasurok a 50 a libro para iti GUMIL Filipinas manipud ken ni Mrs. Benilda Pacioles Ponce ti GUMIL Greece. Personal a donasion ni Ninang Benny dagitoy. Sakbayna, adda sumurok-kumurang a 100 a libro nga impatulodna.

Apagpagisu dagitoy a donasion ni Mrs. Ponce ta inton mabangon ti opisina ti GF iti Suso Beach, maipanto amin a libro nga indonasionna idi GF Library.

Mairaman kadagiti kaudian a libro nga impatulod ni Mrs. Ponce dagitoy: Battle Cry ni Leon Uris, Selected Short Stories ni H.G. Wells, The Gulag Archipelago Part 2 ni Aleksander I. Solzhenitsyn, Wartime Letters of Rainer Marie Rilke ni M.D. Herter Norton, ken adu pay a sabsabali.

Malagip a ni met laeng Mrs. Ponce ti nangidarirag iti pannakabangon ti GUMIL Filipinas Roving Library. Naaprobaran daytoy iti babaen ti administrasion ni Prof. Honor Blanco Cabie.

Thank you manen, Ninang, iti pananglaglagipmo iti GF.