Absent: Col. Lorenzo Ilustre, Dr. Ariel Agcaoili, Ma. Rose A. Cabie, Mindo N. Aquino.

Linuktan ni Oswald A. Valente ti miting babaen ti maysa a kararag.

Naaprobaran ti napalabas a minutes ti miting.

Innaganan ni Apo Bragado dagiti inasitgannan a makatulong iti pannakaangay ti komperensia: Gob. Chavit Singson ti I.S. (nangikari iti P5,000), Santa Mayor Popoy Bueno, Dip. Salacnib Baterina (nangikari iti P12,000), ken Dip. Sonny Alvarez. Innayonna a bareng addanto maneto iti souvenir program. Impakaammona pay a manandanto ni Dr. Crispina Bragado iti agluto para iti komperensia. Dagiti pisikal a kasapulan iti komperensia, maisagsagana metten kas iti conference hall a makalaon iti 200 a tao. Naggatgatang kano payen iti folding beds, pungpungan. Ket kas paset ti tulong ti GF, nailatang ti P10,000 a maigatang iti folding beds.

Iti programa iti komperensia, dagitoy ti naibaga a mairaman:

Dr. Reyes: “Dagiti koma elements ti short story ti ma-discuss.”

Dir. Alvarado: “Mawarasanto koma dagiti delegado iti kopia dagiti lektiur.”

Dir. Valente: “Mai-separate koma dagiti agdadamo kadagiti bangolan.”

Dean Amano: “Ti koma estoria a ma-workshop ket isu dagitay naghuesan ni Rey Duque.” (Maysa ngamin ni Apo Duque kadagiti aglektiur.)

Dr. Ibarra: “Makiddaw koma a maipablaak iti Bannawag dagiti lektiur para kadagiti estudiante.”

Nadakamat pay ni Dir. Alvarado nga agprakpraktisdan iti ipresentarda iti Cultural Night ti GUMIL.

Naidatag iti body ti surat a naggapu ken ni Eliseo Contillo, kameng ti GF. Naiturong ti surat ken ni Apo Bragado. Ti pakabuklan ti surat ket maipanggep iti press release a naawaten ni pasado a presidente ti GF Honor Blanco Cabie a naawaten daytoy ti deed of donation ti lote manipud kadagiti ag-Ver. Innayonna a no awan pay ti nalawag maipanggep iti daytoy, madutnal koma ti idonar kano ni Dr. Reyes.

Mainaig iti lote dagiti ag-Ver, kinuna ni Dir. Concepcion a nakitada kanon ti lugar. Kuna kano ni Mayor Farinas ti Laoag a pabuldoserna kano pay tapno mapalanas ti lugar sakbay a maited kadagiti nakairantaanna. Urayentayo, kinunana, ti pakaammo manipud kadagiti Ver.
Nasublian ti surat ni Eliseo ket kinuna ni Dean Amano: “Ti taeng da Dr. Reyes, kasla taeng metten ti GUMIL. Ket maibilang a kasla saringitda metten ti GUMIL. Ket kas saringit, agtultuloy ti panangtartarabayda iti GUMIL.”

Dita a timmakder ni Dr. Reyes ket kinunana: “Idi saankami pay a nagbibingay kadagiti kakabsatko, awan ti maitudok idi nga itedko. Ngem itan, nakapagbibingaykamin. Indonarko ti maysa a 150 metro kuadrado iti Veterans Federation of the Philippines-Ilocos Sur ket 150 square meters met ti itedko iti GUMIL. Ngem iti maysa a kondision: masapul a maipatakder ti GF House—tapno adda agbalin a pakaibalayan ti GUMIL.”

Kinuna pay ni Dr. Reyes a daytoy ket babaen ti pammalubos ni Doktora Reyes. Daytoy kano ti ibatida a pakalaglagipan.

Itoy a kinuna ni Dr. Reyes, kasta unay ti panagyaman ken panagsisipat dagiti opisial ti GF.

Pormal nga impeksa ni Dean Amano ti panagyaman ti gunglo. Insingasingna pay ti pannakaaramid ti resolusion a mangawat iti donasion ken panagyaman iti agtultuloy a suporta da Dr. Reyes iti GF. Kinunana pay a nagbalinen a Mecca dagiti mannurat nga Ilokano ti Suso Beach.

Inmosion ni Dir. Valente a maaprobaran ti singasing, ket naaprobaran daytoy.

Idi mapagsasaritaanen no kasano a mabangon ti pasdek ti GF, kinuna ni Treas. Eden Bulong a maaramid ti popularity contest. Kada chapter, maikkan iti quota a P50,000.00. Insingasing ni Apo Rochina a maluktan ti popularity contest iti amin a GUMIL group, saan laeng a dagiti provincial chapters.

Dinamag ni Dr. Ibarra no kasano ti kapaut ti inted ni Dr. Reyes a kondision.

Kinuna met ni Doktora Reyes a ti kayat a sawen ni Dr. Reyes, maipakita koma ti intension ti gunglo a mangipatakder iti pasdek.

Kinuna ni Apo Bragado a mabalinen ti P25,000 a pangrugian a pangbangon.

Sek. Rochina: “Imosionko ngarud a mangilatangtayon iti P25,000.00.”

Dir. Valente: “Segundarak ti mosion.”

Impakaammo ti Sekretario Heneral: “Impakaammo kaniak ni Cles Rambaud a kayat kano da Gen. John Castro ken Mars Laconsay a buangayen ti GUMIL Hong Kong.”

Nasublian ti press release. Kinuna ni Rey Andres a madawat ti panangipakita ni Apo Cabie iti Deed of Donation no adda, ket no awan,, paipablaakna nga awan pay ti kasta a donasion.

Naiserra ti miting iti panagyaman dagiti timmabuno iti panangsangaili da Dr. Ibarra, Dr. Mamuad ken Mrs. Raquel iti miting.