Absent: Lorenzo A. Ilustre, Reynaldo E. Andres, Onofrecia I. Ibarra, Elizabeth M. Raquel, William V. Alvarado, ken Guillermo I. Concepcion.

Naangay ti umuna a miting ti GUMIL Filipinas iti 2000 idi Enero 30, 2000 iti kolehio da Apo Presidente Jose A. Bragado (iti Child Jesus College). Sakbay a naaramid ti miting, indaya da Dr. Crispina B. Bragado ken dagiti annak ken mamaestrada ti nabaknang a pangaldaw. Dandanin malpas ti kaan idi sumangpet da Apo Bannawag Editor Dionisio S. Bulong ken ti kaingungotna, ni GF Treasurer Eden C. Bulong.

Kalpasan ti pangaldaw, naru-gianen ti miting. Rinugian ni Presidente J.A. Bragado babaen ti 60-segundo a kararag para iti pimmusay a nagpresidente ti GF, ni Apo Pelagio A. Alcantara.
Kalpasanna, nasupusopan ti minutes iti napalabas a miting a naangay idiay Teppeng, Sinait, Ilocos Sur. Nailawlawag ditoy a ti $100 a donasion ni Apo Benilda Ponce ket agpaay iti GF saan ket a naaramat a pinangpremio kas nailanad iti minutes. Segun iti impaidanon ni Apo Cles B. Rambaud a pakaammo iti GF board, naggapu iti GUMIL Greece ti kantidad a naaramat a pinangpremioda iti naaramid nga on-the-spot poetry writing contest iti komperensia ti GF iti Batac, I.N. iti 1999.

Kinuna ni pasado a presidente Honor Blanco Cabie a naladaw kano a naited ti proposal a mang-dawat iti pundo segun kadagiti taga-NCCA para iti komperensia a maangay iti Tabucolan. Maipanggep met iti kantidad nga aggapu pay iti NCCA, kinuna ni Apo Cabie nga i-follow upna ken ni Myla Buan. Kalpasanna, inmosion ni Apo Cabie a maaprobaran ti naidatag ken nasu-pusopan a minutes iti napalabas a miting a naaramid idiay Sinait, Ilocos Sur. Sinegundaran daytoy ni Bise Presidente Ariel Agcaoili.

Nagreport ni Apo Presidente Bragado maipanggep iti naangay a special seminar-workshop iti Tabucolan a nakitinnulongan ti GUMIL Greece. Nangidonar ti GUMIL Greece ditoy iti P16,000.00. Imparang ni Apo Presidente no kasano ti pannakagastos daytoy.

Napagsasaritaan pay dagiti mabalin a paggapuan ti pundo para iti 2000 Seminar-Workshop iti Tabucolan. Segun ken ni Apo Presidente, rinugiannan ti nagkiddaw iti tulong kadagiti namnamaenna a makatulong iti gunglo. Kiniddawna ti pannakitinnulong ti amin ta awan ti nadawat ti gunglo a tulong manipud iti NCCA.

Naaprobaran ti naidatag nga eskediul ti programa ti 2000 conference ken ti kiniddaw ni Bise Pres. Agcaoili a pannakabaliw ti aldaw a panaglektiurna, maipan iti Sabado imbes nga iti Biernes gapu iti nakaikumitanna iti Biernes. Nupay kasta, maipakitanto met laeng ti programa ken ni Dr. Onofrecia Ibarra kas chairperson ti programa.

Idi madanon ti singasing a pannakaangay koma ti poetry reading contest, naibaga a maaramid koma a pangidayaw iti pimmusay a nagpresidente ti GF Pel Alcantara. Nalagip la ket ngarud manen dagiti pimmusayen a dati a kameng ken opisial ti GF. Inangaw pay ketdi ni Apo Bragado nga umun-una kano ni Apo Cabie ngem kinuna met ni Apo Cabie a no alphabetical, letra “B” kano ti sumaruno iti Alcantara. Ngem kinuna met ni Apo Bragado a tangay isu ti agdama a presidente, malaktawan pay laeng ti naganna.

Idi agmawmaw ti katkatawa, imparang ni Apo Bragado dagiti kinunana a masapul a mabaliwan iti GF Constitution. Naibunong dagiti singasing nga enmienda. Kinuna ni Bise Pres. Agcaoili a palabsan koma ni Atty. Chito Ribao, pangulo ti Legal Committee, daytoy tapno maurnos a nalaing sakbay a maidatag kadagiti kameng ti gunglo. Kinuna ni Atty. Ribao nga idatag-nanto iti sumaruno a miting ti napalanasen a singasing nga enmienda.

Maipanggep iti nominasion iti Bucaneg Awards, kinuna ni Bise Pres. Agcaoili a mabalin koma dagiti opisial ti GF ti aginominar a saan ket a dagiti laeng provincial chapters tapno no adda man malibtawan dagitoy a nasken koma a mapadayawan, mabalin a maidatag dagitoy, tangay adda met ti Awards Committee a mangikeddeng no rumbeng wenno saan a mapadayawan dagitoy. Dinakamat met ti presidente ti GMM (Martin T. Rochina) nga addan innominarda—-ni Apo Editor Bulong.

Kinuna ni Apo Bragado a nasken koma a yukkor dagiti napadayawanen dagiti medaliada iti pasken ti GF kas iti komperensia/kombension. Nalagip nga adda idin nayetnag a Presidential Decree a rumbeng nga aruaten dagiti awardees dagiti medaliada kadagiti amin a napapateg nga okasion ti GF.

Maipanggep iti poetry reading contest, kinuna ni Apo Cabie a daydi koma Apo Pel Alcantara ti pakainaganan ti salip itoy a tawen. Inmosion met ni Direktor Valente nga agbalin ngarud daytoy a Pelagio A. Alcantara Iluko Poetry Reading Contest, a sinarurongan ni Apo Cabie.
Napagkaykaysaan met a tema ti kombension ti: “Ti Literatura Ilokana iti Baro a Siglo ken iti Masakbayan.”

Imbasa ti Sekretario Heneral ti inaramidna a resolusion maipapan ken ni Apo Virgilio Valdez. Napagnunumuan a pirmaanto dagiti opisial ti GF daytoy iti sumaruno a miting.

Nadakamat da Apo Pete Duldulao ken Delfin Dumayas ti awis da Dr. Onofrecia I. Ibarra, Dr. Vi Mamuad, ken Elizabeth M. Raquel nga isuda ti ag-host iti special meeting sakbay ti komperensia. Mabalin nga iti Marso 26 wenno nasapsapa pay. Maangay ti miting iti residensia da Dr. Ibarra iti Paoay, I.N.

Imbunong ni Apo Bragado dagiti solicitation letter para iti souvenir program. Maited dagiti masolicit iti sumaruno a miting. Ni Apo Bragado ti chairman iti daytoy.

Naserraan ti miting kalpasan ti panagyaman dagiti nakimiting kadagiti host.