Angayen ti GUMIL Filipinas ti maika-33 a kombensionna iti Sto. Niño Seaside, Tabucolan, Santa, Ilocos Sur inton Abril 20, 21 ken 22, 2001.

Daytoy ti napagnunumuan iti naangay a board meeting ti gunglo idi Hunio 25 iti Child Jesus College, Kalookan City.

Kinuna ni Jose A. Bragado, GF President, a napagnanamingan ti hunta direktiba a ti gunglo met laeng ti mangsangaili iti kombension kas paset ti panangur-orna iti pondo a pangbangon iti pasdek ti gunglo iti lote nga indonar da agkaingungot a Dr. Godofredo S. Reyes ken Dr. Dedicacion Agatep-Reyes iti Suso ni Aran Brach Resort, Sta. Maria, Ilocos Sur.

Mainaig itoy, kinuna ni Bragado a paset ti kombension ti pannakapili ti Miss GUMIL Filipinas 2001 a saan laeng a pangparangen ti kombension no di pay ket kas pamataudan iti pondo ti GF para iti mabangon a pasdekna.

Kas napagnanamingan, agbalin a popularity contest ti "Search for Miss GUMIL Filipinas 2001" ket makiddaw kadagiti amin a GUMIL chapters a mangipasangoda iti kandidatada.

Kinuna ni Bragado a mapagnunumuanto dagiti alagaden ti nasao a popularity contest iti special board meeting ti GF into Hulio 30 babaen ti panangsangaili da Editor ken Mrs. Dionisio S. Bulong iti pagtaenganda iti Cadaing Village, Talipapa, Quezon City.