Daytoy ti kinuna ni Dr. Aurelio S. Agcaoili, bise presidente ti GUMIL Filipinas, mainaig iti naaprobaran nga enmienda ti Konstitusion ti GUMIL Filipinas iti probisionna iti organisasion dagiti chapters.

Sagudayen ti Article X ti naamendaran a Konstitusion a dagiti “outside-of-the country chapters,” mapagbalinda a sanga ti GUMIL Filipinas. Kayat met a sawen ti “outside-of-the country chapters” dagiti chapter nga adda iti maysa a pagilian wenno iti ania man a political subdivision iti uneg dayta a pagilian.

Iti dati a Konstitusion, naibilang a tsapter probinsial ti nabangon a GUMIL a naipanagan iti maysa nga estado iti ruar ti pagilian ket dagiti sabsabali pay a GUMIL a nabangon iti uneg dayta nga estado, agbalinda a tsapter ti GUMIL iti estado.

Kinuna ni Agcaoili a mayataday unay ti nasao nga enmienda ta sabali ti kasasaad dagiti kakabsat a mannurat iti gangganaet a maidilig kadagiti kakabsatda a mannurat iti Filipinas.

“Adda dagiti agnaed iti sabsabali nga isla, wenno agiinnaddayoda, ket narigat nga agsammakedda iti mother chapterda iti dayta a pagilian wenno estado a yanda. Iti panagbalinda nga independiente ken pannakapaadda ti bukodda nga identidad, ad-adu itan ti maaramidanda,” kinunana.

Dinayaw ni Agcaoili ti panangpanday da Jose A. Bragado, presidente ti GF, Atty. Chito Ribao, legal adviser ti GUMIL Filipinas, ken Dean Gregorio T. Amano, chairman ti Committee on Constitutional Amendments, iti nasao nga enmienda a naaprobaran bayat ti komperensia nasional ti gunglo a naangay iti Sto. Niño Seaside, Tabucolan, Santa, Ilocos Sur idi Abril 28-30 itoy a tawen.

1. Naingato ti tinawen a membership fee manipud iti P50 iti P100. Nailanad daytoy iti Article IV.
2. Agpaay dagiti Board of Directors iti uneg ti dua a tawen manipud iti Abril a tradisional a bulan ti eleksion agingga iti sumaruno nga eleksion iti Abril manipud iti dati a panagpaayda manipud iti Pebrero 1 iti tawen ti eleksion agingga iti Enero 31 ti sumaruno a tawen ti eleksion.